Сылаҥ нэһилиэгин Түөйэ учаастагын олохтоохторо бэйэлэрин күүстэринэн, көҕүлээһиннэринэн үс муоста тутулунна. Бу барыта оттуур ходуһаларга Түөйэ үрэҕин быһа туоруур сыаллаах-соруктаах, өр сылларга кыһалҕа буолан турбут тутуулар.
Манна сүрүн үлэни олохтоохтор субуотунньук күүһүнэн үлэни кыайдылар. Олохтоох дьаһалта -баһылык Макаров Егор Иннокентьевич өйөбүлүнэн олоххо киирдэ.
Сүрүн спонсордарынан муоста материалларын, сваялары буурдааһын, буор үлэтин тиэйии-таһыы, сварка үлэтигэр тиийэ Түөйэттэн төрүттээх дьон-сэргэ буоллулар.
Барҕа махталбытын, бэйэ баҕатынан үлэ төлөбүрүгэр көмө оҥорбут, биир дойдулаахпытыгар убаһа спонсордаабыт Новгородова Антонина Михайловнаҕа биллэрэбит.
Наммаарыкы, Аан Көлүйэ, Былдьаһык туһаайыытынан Түөйэ үрэҕин туоруур үс муосталар матырыйаалларын сыанатын 1,5 мөлүйүөн солкуобайга тэҥнэстэ.
Бу бырайыак Өрөспүүбүлүкэҕэ бастыҥ бырайыактар ахсааннарыгар киирэн Лучшие практики ТОС күрэххэ кыайыылаах буолла.
Үлэһит, дойдуга бэриниилээх дьон уопсай санаата түмүстэҕинэ үлэ күөстүү оргуйан, кыаллар буоларын көрдөрдө.

Бүгүн муосталар үөрүүлээх арыллыылара Түөйэ Кыыһа - Чэлгиэрийэ алгыһыттан саҕаламмыта олус ураты, алыптаах уонна инникигэ эрэли бэлиэтиир түгэнинэн буолла. Улуус баһылыгын тутууга солбуйааччы А. Н. Дьячковскай, Сылаҥ нэһилиэгин баһылыга Макаров Е.И. ыалдьыттаатылар. Нэһилиэк социальнай-экономическай сайдыытыгар кылаатын иһин Бочуотунай Грамотанан Монастырев Николай Алексеевич, Беляев Петр Иванович, Коркин Кузьма Кузьмич, Местников Егор Гаврильевичка, ону сэргэ олохтоохторго махтал сурук туттарылынна. Улуус Баһылыгын Махтал суруга Васильев Василий Васильевичка, Коркин Артур Кузьмичка, Беляев Владимир Ивановичка, Дьячковскай Валентин Григорьевичка үөрүүлээх быһыыга туттарылынна.

Бу сүүнэ үлэлэргэ куораттан техникаларын таһааран буурдуур үлэни баһылаан, кыайа туппут Түөйэттэн төрүттээх урбаанньыт Васильев Василийга олохтоохтор ааттарыттан дириҥ махталы кытта Беляев Иван Иванович дьиэ кэргэнэ туруорбут "Убаһа аҥара" Сертификатын тус бэйэтигэр бэлэхтээтилэр.


Баҕа санаа бастыҥа, ыра санаа барыта олоххо киирэн, тыа дьонун күннээҕи түбүгүн чэпчэттин диэн баҕарыаҕын👏🏻👏🏻👏🏻

02.07.2026